Aggio stracciato 'e llettere d'ammore,
Busciarde comm'a tte,
Ma chi me pò straccià dint'a 'stu core
'Sta smania 'e te vedè?

Io voglio bbene a tte, cara busciarda,
Unica verità d' 'a vita mia,
Damme 'e capricce tuoje,
'Mparame a ddì 'e bbuscie,
Ma torna 'mbracci'a mme!
No, nun m'abbandunà dint' ê ricorde:
Voglio murì cu tte,
Cara busciarda.

Ched'è 'sta vita senza 'na buscia
Ca me sapive dì?
È 'n'ombra ca s'abbraccia 'a gelusia
Ma nun vò cchiù suffrì.

Io voglio bbene a tte, cara busciarda,
Unica verità d' 'a vita mia,
Damme 'e capricce tuoje,
'Mparame a ddì 'e bbuscie,
Ma torna 'mbracci'a mme!
No, nun m'abbandunà dint' ê ricorde:
Voglio murì cu tte,
Cara busciarda.