Neapolitan Songs - Capricce 'e 'nnammurato

Capricce 'e 'nnammurato

(1936)

music: Ernesto De Curtis,
lyrics: Enzo Fusco (Sergio).
Instrumental version


Funtana 'e Capemonte,
Che mmine eternamente,
Chell' acqua cristallina
Che vveve Cuncettina…
Tu, famme 'nu favore:
Quann' essa vene a ghienchere 'o bicchiere
– chell' acqua fresca e chiara –
Tanno ll'hê 'a fà seccà!

Pe' tutt' 'o mmale ch'essa m'ha vuluto
Falle murì d' 'a sete,
Falle desiderà 'st'acqua gelata!
Si vò sapè 'stu fatto comm' è ghiuto e comm' è stato,
Dille ch'è 'nu capriccio 'e 'nnammurato!

Ciardino 'e Capemonte,
Che spanne, eternamente,
Chillu profumo doce
C' 'a mme me mette 'ncroce!
Si nun me cerca scusa,
Quann' essa vene a cogliere 'sti rrose
'Mmiez' a 'stu paraviso,
Tanno s'hanno seccà!

M'ha 'ntussecata 'n'esistenza sana,
E tu, quann' essa vene,
Falle truvà d' 'e rrose sul' 'e spine!
Si vò sapè 'stu fatto comm' è ghiuto e comm' è stato,
Dille ch'è 'nu capriccio 'e 'nnammurato!

Funtana chiara e doce…
Ciardino chin' 'e rose e chin' 'e luce…
Si me venesse a ddì: – Te voglio bbene!
M'addenucchiasse e lle vasasse 'e mmane!