Beneditto 'o mese 'Austo

(1924)

music: Gaetano Lama,
lyrics: Francesco Fiore.
Peppino Brio
(1939 - 2005)


Quanno vene 'o mese 'Austo,
Tutt' 'o mese faccio festa…
Veco a Rosa senza busto,
Carulina senza vesta…
E Maria, bella e curtese,
Sott' 'a voce m'amminaccia:
"Quanno sponta chistu mese,
Te sceppasse ll'uocchie 'a faccia!"

Quanno vene 'o mese 'Austo,
'Sti ffigliole senza busto
Me piace d' 'e guardà…
D' 'e tuccà…
D' 'e vasà!…
Ma che spasso!… Ma che gusto!
Beneditto,
Beneditto,
Beneditto 'o mese 'Austo.

'Nterr' â spiaggia vi' che sole!
Manc' 'o mare me renfresca…
Ch'aggi' 'a dì? Chesti ffigliole
Song' 'o ffuoco 'nfacci'a ll'esca!…
Veco 'a rossa… 'a bionda… 'a bruna…
Cierte piezze speciale:
"Signurì, bona furtuna!
Site asciuta d' 'o spitale?!"

Quanno vene 'o mese 'Austo,
'Sti ffigliole senza busto
Me piace d' 'e guardà…
D' 'e tuccà…
D' 'e vasà!…
Ma che spasso!… Ma che gusto!
Beneditto,
Beneditto,
Beneditto 'o mese 'Austo.

Quanno vene 'o mese 'Austo,
Ogne femmena 'o ffa apposta,
No p' 'o caldo, no, è pe' gusto
Ch'addeventa faccia tosta!
'Nnant' a mme, 'a signora apporta,
Pe' se fà 'na sciorta 'e risa,
Passa e spassa for' 'a porta,
Sulamente c' 'a cammisa!
Quanno vene 'o mese 'Austo,
'Sti ffigliole senza busto
Me piace d' 'e guardà…
D' 'e tuccà…
D' 'e vasà!…
Ma che spasso!… Ma che gusto!
Beneditto,
Beneditto,
Beneditto 'o mese 'Austo.

Quanno vene 'o mese 'Austo,
Vuje ca state 'int' ê ppultrone,
Ve credite ch'esce 'arrusto?
Chelle, invece, sò ccanzone.
Sò ccanzone scritte apposta
Pe' 'stu pubblico galante…
Perdunate 'a faccia tosta.
Meh, cantammo tutte quante:
Quanno vene 'o mese 'Austo,
'Sti ffigliole senza busto
Me piace d' 'e guardà…
D' 'e tuccà…
D' 'e vasà!…
Ma che spasso!… Ma che gusto!
Beneditto,
Beneditto,
Beneditto 'o mese 'Austo.