Sott' ô sole e sott' ê stelle
'Stu penziero corre e vola,
Pe' truvà chi sola sola
Conta ll'ore e aspetta a mme.
'Stu penziero è 'na palomma,
'Na palomma viaggiatora,
Ca po' ffa dint' a mez' ora
Ciento miglia, ciento miglia e arriva a tte…

Vola, e vola,
Vola, palummella;
Luce 'na stella,
Luce 'na stella pe' t'accumpagnà!

'Nu cumpagno cantatore
Sta cantanno 'na canzona,
Ma che grazia, che spressione,
Quase chiagnere me fa…
E pe' Napule luntana,
Triste o allera, sempe bella,
Mò pur'i' 'na canzuncella
Me mettesse, me mettesse a suspirà…

Vola, e vola,
Vola, palummella;
Luce 'na stella,
Luce 'na stella pe' t'accumpagnà!

Comm' a nuje pure 'sti core
Sò figliule e berzagliere,
Vonno correre a piacere,
Vonno ridere e cantà…
E che ffa si quacche vota
Cchiù 'e 'na lacrema lucente
Dint' a ll'uocchie tristamente
Tremma, luce, tremma, luce e se ne va?!

Vola, e vola,
Vola, palummella;
Luce 'na stella,
Luce 'na stella pe' t'accumpagnà!