Ammore guaglione

(1910)

music: Vincenzo Ricciardi,
lyrics: E.A. Mario.
Gianni
Lamagna


'Ammore mio, guaglione, è ghiuto â scola
Tant' anne arreto senza fà maje niente;
Screveva 'ncopp' ê banche una parola
E una parola se teneva a mente.
Screveva "Amalia" e, comme niente fosse,
Pazziava cu 'e nnennelle a zompa fuosse…
E i' nun sapevo scrivere,
Nun ghievo p' 'o suttile,
Senza sapè 'a grammatica
Screvevo dint' abbrile:
"Mio dorge amore,
Ti oh conzervato un pizzo nel mio quore!"

'Ammore mio, guaglione, pazzianno,
Pigliaje subbeto ll'uso a fà filone:
Quaranta juorne 'e scola tutto ll'anno!
E, si ê vvote liggeva 'a lezione,
Truvavo 'mmiez' ê paggine, â 'ntrasatto,
'Nu ricciulillo d'oro e 'nu ritratto…
Io nun 'ngarravo a leggere…
Sbatteva 'o core 'mpietto…
Ma, pure senza virgole,
Liggevo 'stu biglietto:
"Mio dorge amore,
Pur' io per te ci oh un pizzo nel mio quore!"

Mò 'ammore è tutto calamaro e penna,
Ma i' mm'arricordo a chella piccerella:
Purtava 'o panarino cu 'a marenna,
'Na cinta a tre culure e 'na cartella…
E i' ll'aspettavo a 'o soleto puntone
Pe' dì: "Guarda che sole! Fa' filone!"
Zero cu ll'asteristico
Pigliaje a bbene e a mmale!
I' avette 'a peggia media:
Pur' essa tale e quale!
Dduje cunte pare:
"Zero allo studio… e vase a centenare!"