Tene 'a faccia 'e saracena,
Ll'uocchie 'e mariola,
Ll'aria 'e 'na riggina,
'Sta maesta c' 'o pennino,
Bella comm' ô sole,
Che malizia tene!

Si te fa 'nu surriso,
Te siente 'mParaviso,
Ma doppo vaje all'Infierno llà pe' llà!

Oje, lloch' 'a ze' maesta
Cu ll'uocchie 'e mariola
Tene mente a tte!
Chella 'e fina e t' 'o fa apposta,
Cu 'na guardata sola te pò fà cadè.
E se trova sempe 'a coppa,
Ma cu mme succede 'o 'ntuppo,
Qua' juorno 'e chisto
'Ncoccia 'a freva e 'a scippe 'o tuppo.

Tengo fisso 'int' ô cervello
Ca 'sta ze' maesta
Me fa ll'angarella,
Ma io, ca sott' ô vicariello,
Nun mme tengo apposta,
Stongh' 'e sentinella.

Si ll'aggio dint' ô stritto
Succede 'o quarantotto
Embé, tutto pe' tutto, c'aggi' 'a fà!

Oje, lloch' 'a ze' maesta
Cu ll'uocchie 'e mariola
Tene mente a tte!
Chella 'e fina e t' 'o fa apposta,
Cu 'na guardata sola te pò fà cadè.
E se trova sempe 'a coppa,
Ma cu mme succede 'o 'ntuppo,
Qua' juorno 'e chisto
'Ncoccia 'a freva e 'a scippe 'o tuppo.