'A testa d'aruta

(1893)

music: Vincenzo Valente,
lyrics: Salvatore Di Giacomo.
Instrumental version


– Mamma, mamma, sentite 'a campana
C'a San Giorgio la messa mò sona…
– Figlia, figlia, 'amme 'o sciallo e 'a curona,
'Nzerra 'o stipo, arricetta 'o cummò:
Fatte 'a capa, dà 'o grano a 'e galline,
Miette ll'acqua 'int' â testa d'aruta…
Io c' 'o sciato me ll'aggio crisciuta,
Statt' attienta… s'avesse seccà!
– E mamma, jate,
Sentiteve 'a messa;
L'aruta adacquata ve faccio truvà.
E mamma, jate,
Sentiteve 'a messa;
L'aruta adacquata ve faccio truvà.

Rataplan, rataplan, rataplera!
Arrivaje 'nu squatrone 'e surdate!
E a cavallo a 'e cavalle sudate
Se mettettero attuorno a guardà.
– Capurà, che facite a cavallo?
Si scennite… ve dongo 'na cosa… –
(E 'na fronna d'aruta addirosa
Carulina lle jette a piglià.)
– E ssì… tenite!
Pigliateve 'aruta!
(Ca 'o bbene voluto nun fa cchiù scurdà.)
– E ssì… tenite!
Pigliateve 'aruta!
(Ca 'o bbene voluto nun fa cchiù scurdà.)

– Bella giò, ca 'st'aruta tenite,
Premmettete ca 'o dico a 'o sargente? –
'O sargente 'o dicette a 'o tenente,
E se jettero 'aruta a piglià.
Rataplan! Sona 'a tromba 'a partenza…
Tutt' e tre salutaino d' 'a sella,
Cu 'na fronna d'aruta nuvella
Appezzata vicino 'o sciaccò…
E Carulina,
Cu 'e llacreme a ll'uocchie,
Luntano luntano 'e vedette sparì!
E Carulina,
Cu 'e llacreme a ll'uocchie,
Luntano luntano 'e vedette sparì!

Figliulè, quanno 'a gnora se nn' esce
Rebazzata tenite 'a fenesta,
Ca si no de l'aruta 'int' â testa
Ogneduno 'na fronna ne vò…
E l'aruta, si è coveta fresca
O se secca, o si no s'ammalesce,
O abbeluta rummane e nun cresce,
O addurosa nun torna maje cchiù…
E 'a canzuncella
D'aruta nuvella
Guardate, vedite… fernesce accussì.
E 'a canzuncella
D'aruta nuvella
Guardate, vedite… fernesce accussì.