Neapolitan Songs - 'A primma vota

'A primma vota

(1897)

music: Ernesto De Curtis,
lyrics: Giambattista De Curtis.
Instrumental version


'A primma vota arret' a 'na muntagna
'O sole se cuccava e asceva 'a luna,
E i' me ritirava d' 'a campagna,
E i' me ritirava d' 'a campagna.
Passaje 'nu giuvinotto pe' sfurtuna,
Purtava 'mmano tanta belli rrose,
Me s'accustaje vicino e, a una a una,
Cu 'na parola doce 'e dette a mme.
I' lle dicette: – Grazie!… 'O salutaje…
Isso maleziuso me guardaje.

Quanno me ritiraje 'a casa mia,
Mettette chelli rrose 'nnanz' 'a lampa,
Me se liggeva 'nfaccia ll'allegria:
Era cchiù rossa 'e chelli rrose llà.

Ll'urdema vota pe' 'na strata nova
Turnava i' sola sola e senza luna;
M'accumpagnava sul' 'a malanova,
M'accumpagnava sul' 'a malanova.
Passaje 'stu giuvinotto pe' sfurtuna,
Purtava cierte schiocche 'e sciure arance;
I' senz' addimmannà ne sceppaje una,
E isso: – Uh, sora mia, nun sò pe' tte!
I' rimanette morta… Suspiraje…
Isso cu 'ndifferenza me lassaje…

Quanno me ritiraje 'a casa mia,
Jettaje chilli sciure 'ncopp' ô lietto…
Me se liggeva 'nfaccia 'a malatia:
Era cchiù ghianca 'e chilli sciure llà.