'A mamma dice:
Chella è fissata!
Povera figlia, sta malata comm' a cchè!
Nun trova pace
Pe' 'nu minuto.
Suspira, chiagne, te fa pena d' 'a vedè!
Ê vvote, dice: – Senti,
Mammarè, tu t'hê 'a curà! –
Signò, stateve attiento…
Si nun sbaglio, è 'a verità!

'Sta pazzarella,
Carella,
Bellella,
Si trova 'o pazzariello,
Carillo,
Bellillo,
Fernesce 'e stà sciupata,
Scucciata,
Malata…
Lle passa 'a pazzaria,
Sentite bbuono a mme!
'Sta pazzarella,
Carella,
Bellella,
Truvanno 'o pazzariello,
Carillo,
Bellillo,
Se pò ssanà cu 'e vase,
Fernesce ca se sposa
E po', che bella cosa:
'E pazze, 'a dduje, sarranno tre!

Ma stammatina
Nce ll'aggio ditto:
– Signò, Sofia sta meglio 'e vuje e meglio 'e me! –
– E tu 'a vuò bbene?! –
M'ha ditto 'e botto…
– 'A pazza e 'o scemo, sà che coppia! Siente, siè! –
– Guagliò, 'nu masto 'e forgia
Manco 'a sape adderezzà…
Ce vò 'nu mastuggiorgio!…
– Quanno è chesto, eccomi qua!

'Sta pazzarella,
Carella,
Bellella,
Si trova 'o pazzariello,
Carillo,
Bellillo,
Fernesce 'e stà sciupata,
Scucciata,
Malata…
Lle passa 'a pazzaria,
Sentite bbuono a mme!
'Sta pazzarella,
Carella,
Bellella,
Truvanno 'o pazzariello,
Carillo,
Bellillo,
Se pò ssanà cu 'e vase,
Fernesce ca se sposa
E po', che bella cosa:
'E pazze, 'a dduje, sarranno tre!