'A meglia voce

(1929)

music: Nicola Valente,
lyrics: Francesco Fiore.
Consiglia
Licciardi


Canzona amata!
Canzona mia sunnata
A ll'ombra 'e 'na ringhiera
'A parte d' 'a Riviera,
Addò lucente è ll'aria
Si pure 'a strada è scura
E sott' â luna pallida
Napule è 'na pittura!
Oj core e cantala
'Sta canzuncella doce…
Canta cu ttutta ll'anema,
Canta cu ttutt' 'a voce!
Pienze che all'estero
Uocchie ca chiagneno,
Core c'aspettano
Vonno c' 'a voce 'e Napule
Nun addà maje murì!

Canzona amata!
Canzona mia cantata
Pe' 'ncopp' ê lloggie chiare,
Pe' dint' ê vvarche a mmare!
Curre pe' ttutta Napule,
P' 'e vville e p' 'e ciardine,
Va! Sceta pe' Pusilleco
Chitarre e manduline!
Oj core e cantala
'Sta canzuncella doce…
Canta cu ttutta ll'anema,
Canta cu ttutt' 'a voce!
Pienze che all'estero
Uocchie ca chiagneno,
Core c'aspettano
Vonno c' 'a voce 'e Napule
Nun addà maje murì!

Canzona mia!
Io moro 'e pecundria
Ca pure a 'stu paese
Mò cantano francese!
Mutive senza musica…
Vierze senza raggione…
No! Chi vò bbene Napule
Addà cantà 'e ccanzone!
Oj core e cantala
'Sta canzuncella doce…
Canta cu ttutta ll'anema,
Canta cu ttutt' 'a voce!
'O vvì? 'Sti llacreme
Veneno all'estero,
Addò suspirano
C' 'a meglia voce 'e Napule
Nun addà maje murì!