Oj luna, meza triste e meza allera,
Tu nun sì robba 'e ccà; sì robba 'e fore…
Te canuscette – e fuje 'na Primmavera –
Tant'anne fa, quanno p' 'a via d' 'o mare
Giuvinuttiello, me purtaje ll'ammore…

No, tu nun sì 'e ll'America,
No, tu sì 'a luna 'e Napule…
Meh, parlame 'e Pusilleco,
'O cielo mio che ffa?
Ma 'a luna, 'a luna 'e Napule
S'ha cummigliato ll'uocchie cu 'na nuvola,
Senza putè parlà…

Ca si luntano me purtaje ll'ammore,
'Nzuonno mme sonno tutt' 'e nnotte 'o mare,
Mare che ccanta meglio 'e 'nu tenore,
E canta sempe, d' 'a matina â sera;
Mare ch'è cchiù turchino 'e tutt' 'e mare.

No, tu nun sì 'e ll'America,
No, tu sì 'a luna 'e Napule…
Meh, parlame 'e Pusilleco,
'O cielo mio che ffa?
Ma 'a luna, 'a luna 'e Napule
S'ha cummigliato ll'uocchie cu 'na nuvola,
Senza putè parlà…

E dimme, oj luna, è vvierno o è Primmavera?
Dimme: a 'o paese mio se canta ancora?
Luceno sempe 'e lume p' 'a Riviera?
– No, ninno mio, ma 'a notte, dint' 'o scuro,
Quacche chitarra va sunanno ancora…

No, tu nun sì 'e ll'America,
No, tu sì 'a luna 'e Napule…
Meh, parlame 'e Pusilleco,
'O cielo mio che ffa?
Ma 'a luna, 'a luna 'e Napule
S'ha cummigliato ll'uocchie cu 'na nuvola,
Senza putè parlà…