E chesta è 'n'ata sera…
E me pareva allera…
Ma, bello e buono, senza nce penzà
Turnammo a ccummincià…
Nun è cuntenta ancora
'Sta bella luna chiena!
E, a ll'urdemo d' 'a sera,
Me vene appriesso e nun me vò lassà!

E me fa tanto mmale 'sta luna chiena
Ca, 'int' 'o cchiù bello,
Me parla 'e "chella"…
E accumminciammo 'o solito riturnello:
"Ricordatella…
Nun t' 'a scurdà…"
Luna chiena,
Addò sta
Chi diceva:
"Pe' tte voglio campà!"?
Tu ca me parle 'e chella
Ca me dà pena,
Oj luna chiena,
Che spunte a ffà?!…

Amice d' 'o "Quartiere",
Faciteme 'o piacere:
Dicitencello vuje, pe' carità,
Facitela turnà!…
E si tenite core,
Guardate 'a luna chiena!
Io 'a veco tutt' 'e ssere…
E prego 'e Sante pe' m' 'a fà cagnà!

E me fa tanto mmale 'sta luna chiena
Ca, 'int' 'o cchiù bello,
Me parla 'e "chella"…
E accumminciammo 'o solito riturnello:
"Ricordatella…
Nun t' 'a scurdà…"
Luna chiena,
Addò sta
Chi diceva:
"Pe' tte voglio campà!"?
Tu ca me parle 'e chella
Ca me dà pena,
Oj luna chiena,
Che spunte a ffà?!…

Amice!
Dicitencello vuje
Ca me fa mmale assaje
'Sta luna chiena!