Saccio ca suoffre pe' mme…
Saccio ca muore pe' mme…
Io tengo 'o tiempo cuntato,
Sto sempe affarato,
Ma soffro cchiù 'e te!…
Trenta minute che sò?…
Dint' a mmez'ora che vuò?…
Pe' nun ghì a fernì luntano
Io te purtaje 'a parte 'e ccà…

Litoranea, vuò sapè che sì?
Tu sì 'a Villa 'e chi nun pò tardà!
Quatte passe appere
Stammo 'nnanz' 'o mare,
Quatte passe arete
E stammo 'o centro d' 'a città!
Vocca bella pe' se fà vasà,
Saje che dice quanno sta cu mme?
"Jammo 'a parte 'o vverde,
Ccà ce sta chi guarda,
Jammo 'a Litoranea
Addò a mez'ora nun se perde!"
E accussì, 'nnammurata carnale,
Ce vasammo, ma senza parole
E 'sti vvocche, po', tutto pe' tutto
Se contano 'o fatto
Ca s'hanno 'a cuntà…
Litoranea, vuò sapè che sì?
Tu sì 'a Villa 'e chi nun pò tardà!
Si a mez'ora 'e tiempo
Passa comm' ô lampo,
Litoranea mia, tenimmo a tte!

Io penso ê vvote 'e tardà…
Tu già prugiette 'e cagnà!…
Dici: "Posillipo alto,
Faccimmo 'nu salto,
Stasera, che fa?…"
Po' io me metto a penzà…
Po' tu te miette a cuntà…
… e Posillipo è scartato
Pecché 'o tiempo nun ce sta!…

Litoranea, vuò sapè che sì?
Tu sì 'a Villa 'e chi nun pò tardà!
Quatte passe appere
Stammo 'nnanz' 'o mare,
Quatte passe arete
E stammo 'o centro d' 'a città!
Vocca bella pe' se fà vasà,
Saje che dice quanno sta cu mme?
"Jammo 'a parte 'o vverde,
Ccà ce sta chi guarda,
Jammo 'a Litoranea
Addò a mez'ora nun se perde!"
E accussì, 'nnammurata carnale,
Ce vasammo, ma senza parole
E 'sti vvocche, po', tutto pe' tutto
Se contano 'o fatto
Ca s'hanno 'a cuntà…
Litoranea, vuò sapè che sì?
Tu sì 'a Villa 'e chi nun pò tardà!
Si a mez'ora 'e tiempo
Passa comm' ô lampo,
Litoranea mia, tenimmo a tte!