Lavannarella mia, lavannarella,
Me pierce 'o core quanno cante e spanne.
Te chiammano a 'Ntignano 'a Rigginella,
E tu cu 'sti bbellizze lave 'e panne?
Lavannà, 'stu scerià
Te fa troppo cunzumà!
Si cchiù nun vuò lavà, mussillo doce,
Accucchiate cu mme, e può stà sicura,
Ca te faccio lassà 'o cufanaturo!

Comme 'ncopp' a 'sta preta tuorce 'e panne,
Me tuorce 'o core mio dint' a chistu pietto.
Te vengo appriesso, sò quase dduje anne,
E tu n' 'o vuò capì?… Ma che nce aspiette?
Lavannara, lavannà,
Nun sì nnata pe' lavà!
Spusammo, e si vuò fà 'a lavannara,
Allora nce 'o vedimmo 'nfra de nuje,
Lavammo e 'nzapunammo tutt' 'e dduje!

Me sto squaglianno comm' a 'stu sapone,
Pecché te voglio troppo, troppo bbene!
Pe' tte sò asciuto pazzo e nun raggiono!
Mò faccio chello ca ne vene, vene!
Lavannara, lavannà!
Accunziente?… Che buò fà?
Si no, succede ca 'nu juorno 'e chisto
T'afferro e te 'ncatasto sott' 'o muro…
Te rompo 'a preta e 'o cufanaturo!