Si mamma toja t'ha ditto,
Si mamma toja t'ha ditto
Ca sulo per iscritto
Nuje putimmo amoreggià,
Dincello ca a chest'epoca,
Cu ll'aeroplano e 'a radio,
'O munno è allero e facile;
Vulanno può spusà…
Vulanno può spusà!

Strignimmoce, vasammoce
C' 'a giuventù va 'e pressa.
Scetammoce, spassammoce
C' 'a giuventù ce lassa.
'Nu vaso p' 'e Camaldule,
'N'abbraccio â part' 'o Vommero.
Ma 'a sera, pe' Pusilleco,
T'adduorme 'mbracci'a mme.

Mò sò schiuppate 'e rrose,
Mò sò schiuppate 'e rrose,
E i' penzo a tanta cose
Prufumate comm' a cchè.
Fernimmola cu 'e llettere,
Sò 'e vase ca ce aspettano.
Mò 'sti ciardine 'e Napule
Se 'nfiorano pe' tte…
Se 'nfiorano pe' tte!

Strignimmoce, vasammoce
C' 'a giuventù va 'e pressa.
Scetammoce, spassammoce
C' 'a giuventù ce lassa.
'Nu vaso p' 'e Camaldule,
'N'abbraccio â part' 'o Vommero.
Ma 'a sera, pe' Pusilleco,
T'adduorme 'mbracci'a mme.

Tu hê 'ntiso che sfurtuna?
Tu hê 'ntiso che sfurtuna?
Mò parlano d' 'a luna
Ca da 'o cielo ha da cadè.
Pe' tte 'stu fatto è serio,
Nun ce perdimmo 'nchiacchiere!
Si cade 'a luna 'e Napule,
Chi luce 'nfront' a tte?…
Chi luce 'nfront' a tte?

Strignimmoce, vasammoce
C' 'a giuventù va 'e pressa.
Scetammoce, spassammoce
C' 'a giuventù ce lassa.
'Nu vaso p' 'e Camaldule,
'N'abbraccio â part' 'o Vommero.
Ma 'a sera, pe' Pusilleco,
T'adduorme 'mbracci'a mme.