È 'nu ciardino chesta casa vosta,
Ce avite mise rose a tutt' 'e pizze.
P' 'e stanze for' 'a loggia e a 'sti ffeneste
Ce sta 'n'addore 'e rose a fà ascì pazzo.
Ah, che prufumo ch'è 'sta casa vosta!

Ma 'a rosa cchiù fresca è dint' a 'sta casa,
Cchiù bella e addurosa già saccio addò sta!
A 'sta casa d' 'e rrose
Quanta cose,
Quanta cose ca me fa penzà.

Che sfarzo e lusso 'int' a 'sta casa vosta!
Che passione e quanta accuratezza
Ca site inteliggente e avite gusto!
Se vede ca ll'entrata e tutt' 'e llastre
Addò se legge d'oro 'o nomme vuosto.

Ma 'a rosa cchiù fresca è dint' a 'sta casa,
Cchiù bella e addurosa già saccio addò sta!
A 'sta casa d' 'e rrose
Quanta cose,
Quanta cose ca me fa penzà.

Tenite tutto dint' a chesta casa;
'O lietto veco ma nun veco 'o sposo,
Padrona 'e casa e 'sta schiuppata 'e rose
'Nu desiderio 'ncore m'hanno miso:
Si fosse 'o sposo, nèh, che bella cosa!

Ma 'a rosa cchiù fresca è dint' a 'sta casa,
Cchiù bella e addurosa già saccio addò sta!
A 'sta casa d' 'e rrose
Quanta cose,
Quanta cose ca me fa penzà.