Che sfarzo, caspeta, che tulettona!
Sciabò, sciammaria, nocca e fisciù!
'Ntunè, staje propeto simpaticona,
Sì 'a capa femmena ma… nun sì tu!…
Songo… anduvinece? Sò 'sti scarpine
Che fanno 'nzunchete, 'nzunchete, 'nzù!
Si 'ncante ll'uommene quanno cammine
Sarrà 'stu 'nzunchete, ma… nun sì tu!…
'Nzunchete, 'nzù!

Nun te pretennere!
'Nzunchete, 'nzù!
'Nzunchete, 'nzù!
Sì 'a capa femmena;
Ma nun sì tu!

Mò cu 'sta museca, sì, a Piedegrotta,
Nuje nce sperdessemo, me può chiammà;
Si ce vò spartere lu votta votta
Teng' 'o remmedio pe' te truvà.
Ma primmo 'mparame, pe' te risponnere
Subbeto subbeto, comm' aggi' 'a fà?
Meh, jammo, accostate, nun t'annasconnere!
T'ha fatto specie la verità?
'Nzunchete, 'nzù!

Nun te pretennere!
'Nzunchete, 'nzù!
'Nzunchete, 'nzù!
Sì 'a capa femmena;
Ma nun sì tu!

Ma a la malizia de 'stu rummore,
'Ntunè, mantenere nun pozzo cchiù!
La mana mietteme 'ncopp' a 'stu core…
Siente?… Fa 'nzunchete, 'nzunchete, 'nzù!
Statte!… Penzannoce ll'aggio truvato!
Mò te può sperdere comme vuò tu,
'Stu core a sbattere sta preparato,
Sientele, sientele: 'nzunchete, 'nzù!
'Nzunchete, 'nzù!

Pigliarte collera
Mò nun può cchiù!
Mò nun può cchiù!
'A capa femmena,
Sì, sì… sì tu!