'Na bella luggetella a Marechiare
Cu 'a tenna e 'a luce elettrica p' 'a sera;
Teresenella cu 'e bbraccelle 'a fora,
S'abbraccia 'nu palummo e guarda a mmare…
E a ll'aria fresca 'e 'nu tramonto d'oro
'Na voce 'nterr' arena ca suspira:
"Glù-glù-glù…
Comm' ô palummo i' sò
E a notte, 'mbracci'a mme,
'Na turturella sì…"
Canta! Canta!
Canta chi vò cantà!…
Chest' è 'a canzona d' 'a felicità.

'Nu juorno 'nu vicchiotto cu 'e denare
Cercaje Teresenella pe' mugliera…
Dicette 'a mamma d'essa: "Quant' onore!…"
E 'o pate, 'a copp' 'a mano: "Che piacere!…"
Ma 'e notte, se sentette dint' ô scuro,
Cchiù ddoce 'a stessa voce 'mmiez' ô mare:
"Glù-glù-glù…
Comm' ô palummo i' sò
E tu, abbracciata a mme,
'Na turturella sì…"
Canta! Canta!
Canta chi vò cantà!…
Chest' è 'a canzona d' 'a felicità.

'A sera d' 'a parola… Ammore! Ammore!
'A sposa… scumparette… e bonasera!
Sudava friddo, 'o viecchio, e p' 'a tintura,
S'era 'nguacchiata 'a faccia nera nera!…
E pe' Surriento, sott' â luna chiara,
Felice suspiravano dduje core:
"Glù-glù-glù…
Comm' ô palummo i' sò
E tu, abbracciata a mme,
'Na turturella sì…"
Canta! Canta!
Canta chi vò cantà!…
Chest' è 'a canzona d' 'a felicità.